Ùghdar
Dòmhnall MacFhionghain
Fiosrachadh

Chaidh an t-òran seo a dhèanamh nuair a bha uisge-beatha air a raiseanadh aig àm an Dàrna Cogaidh agus bha Dòmhnall an urra ris an deoch làidir aig Taigh-òsta Eilean Iarmain. B’ e ‘Eairdsidh’ Eairdsidh Caimbeul am post a bha a’ fuireach aig 39 Camas Croise. B’ e Alasdair MacAonghais (Alasdair Mòr Alasdair Bhàin) à Duisdeil Mòr” Am Polasman Mòr”.

Faclan

O ’s e mise, hé ’s e mise 

O ’s e mise, fhuair an tàire 

Fhuair mi tàir’ aig a’ Bhliadhn’ Ùir seo 

Cumail sùgh ri daoine pàiteach.  

 

Bha mi duilich airson Eairdsidh 

E gus lùbadh fon a’ mhàileid 

Leis a bh’ ann de phostal orders  

Dhèanadh iad ’n taigh-òsta thràghadh.  

 

Thàinig bodaich às gach baile 

Cuid a shaoil leibh nach robh làthair 

Bha gach fear dhiubh ’g iarraidh botul 

Mun do stad iad air Dimàirt dheth.  

 

Thàinig fòns às an Àth Leathann 

Thàinig barrachd is a dhà dhiubh 

’S ann a thuirt fear dhiubh rium “A Dhòmhnaill, 

Feuch an toir thu dhomhsa dhà dhiubh.” 

 

Muinntir Tharscabhaig ag èigheachd  

Nach eil cho feumach as an àite 

Gu bheil ann de dhaoine bochda 

Dhan dh’iarr an dotair sùgh a’ bharley. 

 

Fir Shàsaig agus Fearann Dòmhnaill 

Nuair a chruinnich iad ri chèile  

Bha gach fear ag iarraidh botail 

’S deoch a ghabhadh iad sa bhàr dheth. 

 

Nuair chruinnich Duisdeil ri chèile  

Cha robh iad na b’ fheàrr na càch 

Am Polasman Mòr ’s e cho fiadhaich 

Bho nach fhaigheadh e na dh’iarr e.  

 

Ach an Camas Chros is Eilean Iarmain 

Tha daoine rianail ciallach bàidheil  

Cha d’ iarr gach aon dhiubh ach trì botail 

Dhèanadh dhaibh a-nochd ’s a-màireach